七連升嘅港股終於斷纜，不過升咗咁多日，回調一下亦好正常。
恒基發展（00097）舊年九月因市場憧憬四叔收購TVB（00511），並會將股份注入恒發而炒過一轉，不過隨着事件不了了之，恒發股價亦回復平淡，長期在0.75元至0.85元之間橫行，但上周五卻見異動，逆市升至0.82元，收報0.8元，升幅2.56%，而且成交達2,485萬股，較之前一日的230多萬股大增10倍。
今時今日恒發手頭資產只有杭州錢江三橋60%權益，不過集團持有13.66億元現金及現金等價物，相當於每股0.448元，合計每股資產淨值則為0.52元。
按道理，大股東應不會任由恒發長時間「半天吊」，浪費上市資源，未來可能嘅做法，一係注資轉型、一係將僅餘的錢江三橋資產出售，將資金分派股東。無論開邊瓣，都可以作為炒作藉口，上周五異動，不排除有春江鴨因素在內，跟炒一轉無妨，目標1元，0.75元止蝕。
詩詩