孖妹缸湖遊：日圓貴再搞冧經濟？

趙：法巴零售衍生產品部聯席董事趙海珠

羅：交銀香港分行首席經濟及策略師羅家聰

息差收窄 圓匯再攀

祺祺：你讀緊嘅MBA（工商管理碩士）課程係由本港嘅大學開辦嘅，我知你好喜歡日本文化，但專登停薪留職去新潟縣日本國際大學留學，真係需要好大勇氣喎！

　趙：當我向上司提出要出國讀書，本來打算要請辭。我係一個非常地道嘅香港人，未試過去外國讀書，讀大學修讀日文時已經好想去日本留學，但因為經濟考慮，願望一直無法達成，所以去年趁有機會真係好想去體驗，估唔到可以停薪留職。到咗日本，我有機會與超過40個國家，唔同文化及背景嘅留學生一齊生活，當中包括嚟自烏茲別克、秘魯等地，對日本文化滿有熱誠嘅朋友。

高妹：不過啲Yen（日圓）貴咗咁多，喺嗰邊嘅使費真係幾高，只係日本經濟仍然一般。

　羅：日本經濟喺六十至七十年代每年增長逾10%，曾風光一時，之後經濟增長一直收縮，但圓匯就係咁升，所以唔可能單用經濟環境去解釋匯價走勢，如果國家貨幣因經濟差而轉弱，圓匯又點會由六十年代時約360兌一美元，升到依家嘅80水平？圓匯走勢受到美元及日圓嘅息差主宰，日本嘅通脹壓力比美國大，當地經濟改善得好快，我覺得今年日本利息或會升得快過美元，雖然現時美國利率高於日本，但將來兩國息差可能會收窄，意味着美元兌日圓匯率轉弱，圓匯仲有得升。

交銀香港分行首席經濟及策略師 羅家聰：匯價走勢唔可能單以經濟環境去解釋，我睇日圓仲有得升！

法巴零售衍生產品部聯席董事 趙海珠：物價貴咗，我喺日本留學時，買盒洗衣粉都要格價。

百物騰貴 無礙消費

祺祺：Alison有乜嘢慳錢貼士畀想去日本嘅朋友仔呀？

　趙：到一個國家旅行與生活係好唔同，以前我每次到日本旅行都唔捨得走，仲好想喺當地生活，不過住落先發現喺衣食住行方面有好多顧慮，因為圓匯轉強，當地物價對我嚟講貴咗，出街食飯起碼要100蚊一餐，所以我要學做「師奶仔」，連買盒洗衣粉都要格價。由於宿舍冇煮食用具，出入交通唔方便，我成日都會去便利店買便當「叮」，不過一盒要約60元都唔算平。

高妹：今日係日本成人禮，有報道話唔少滿20歲嘅當地年輕人驚搵唔到工，日本經濟係咪咁差呢？

　趙：喺日本搵工唔算難，當地企業愈嚟愈國際化，唔再局限聘請本地人，唔少同學亦成功被企業取錄為實習生，甚至有證券行為提升員工嘅英語能力，安排佢哋喺我讀嗰間大學，與我哋呢班留學生一齊生活，想佢哋多啲用英語溝通。喺消費模式方面，日本人比較及時行樂，好似去迪士尼會瘋狂消費，差唔多300蚊一個嘅卡通頭飾佢哋都會買，甚至會買埋全身嘅造型。

祺祺：日本首相菅直人好重視「觀光立國」，早前更進一步放寬中國遊客簽證限制嘅政策，可能係眼見中國人消費力高，希望藉此開拓零售業市場，撐吓本土經濟。

　羅：不過包括日本及香港在內嘅經濟發達地區，人均經濟增速都放緩，主因係出生率低，好多經濟體喺八十至九十年代後，無法再由第三類產業轉型為第四類產業，講緊嘅可能係科技及創新等知識型產業，同時又缺乏一啲突破性增長潛力，以前可減低生產成本嘅工業革命以及環球一體化咁。日本人口老化問題喺六十年代已出現，較其他地區先行，目前仍被人口因素主導當地經濟。

港GDP增長今年見頂

高妹：香港與日本都係成熟經濟體，會唔會一樣冇運行？

　羅：人口老化係每個地方都面對嘅問題，不過香港冇日本咁嚴重，年輕人口比例萎縮速度冇咁快。睇番周期性因素，環球經濟增長上次喺○七年見頂，如3至4年後再見頂係符合周期性因素，而美國10年期國債及3個月國債嘅長短息差有掉轉行嘅迹象，息差喺去年首季見頂，所以本港可能跟隨環球經濟，按年GDP喺今年見頂，之前或會帶動到消費業，失業率就會滯後見底。

　趙：依家香港好多舖頭都排晒長龍，加上深圳放寬赴港個人遊，所以我特別睇好消費股，為抗衡通脹，擁有自己嘅安樂窩仍係我嘅目標，但我覺得依家樓價仲係偏貴，未必係入市時機。我依家嘅投資都係以香港及內地嘅基金為主，不過為享受低吸股票機會，唔會成日轉換基金選擇。為免銀行存款被蠶食，散戶亦可將30%至50%資產作窩輪投資，近排可留意持續有資金流入嘅商品輪。

估今年樓價20%人睇升逾兩成

雖然政府出招打壓樓市已有個半月，但本港樓價依然「壓不住」，你認為今年本港樓價表現如何？據今期《東方日報》網上民調截至上周六晚上6時嘅結果顯示，20.2%人認為今年樓價會升20%以上，估升10%至20%以及10%以下嘅分別有22.9%及16.6%；另有17.8%人覺得樓價會橫行，22.5%人就估會下跌。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk