市場熱線：港鐵穩健買得過

美國失業率跌到9.4%，但非農職位增長差過預期，成為獲利回吐嘅藉口。話咁快美國公司又派第四季成績表，打頭陣仍然係「美女」（美鋁），七、八成企業業績好過預期已係例牌菜，上一季業績期對個市已冇乜刺激作用。美匯指數上個禮拜大反撲，升到81樓上，歐元跌到1.29，商品價格亦冇運行；雖然話祖國天氣凍，加埋澳洲昆士蘭省洪災影響焦煤出口，應該有利煤炭股至啱，但兗煤（01171）上周二創新高之後連續3支陰燭回落，顯然後勁不繼。

民行（01988）發A股集資，雖然唔關H股事，但低價發股對攤薄H股權益唔着數，今日復牌都要捱沽，招行（03968）被傳為下隻伸手對象，平保（02318）亦傳做「伸手牌」，就算公司出通告澄清都唔能夠令孖屐放心。依家祖國實施差別存款準備金率，今年借錢需求又大，唔儲定多啲彈藥盞「蜑家雞見水」。

呢個禮拜祖國會公布十二月份嘅經濟數據，上個禮拜已見PMI回落，大家關心通脹率係點，由高位5.1%回落係意料中事，但好衰唔衰撞正嚴寒天氣搞到食品價格居高不下，而商品期貨又重上高位，所以加息又殺到埋身，差在會唔會等到過完年至加。

港鐵（00066）上周五逆市升近3%，逼近30蚊大關，但呢排個市冇乜好買，自然有投資者揀番呢類穩陣股。

業務瓣瓣有睇頭

事實上，橫睇掂睇佢嘅鐵路同地產兩瓣都有睇頭，先講鐵路嗰part，今年巴士、小巴、的士會相繼加價，油價又加，港鐵嘅載客量會有所得益，而香港各條支線亦陸續籌劃或興建當中，將來坐地鐵甚至可貫通中港到珠三角其他城市。

除咗香港之外，港鐵喺內地經營亦如魚得水，攞咗多條地鐵的營運合約，例如北京四號線、深圳龍華線、上海和杭州部分地鐵路線等。

至於地產亦唔使多講，就算政府用到額外印花稅辣招初期，樓價下跌嘅多數係偏遠地區，港鐵呢類沿線物業依然硬淨。依家樓市無論量價都逐步回升，地主股又生猛番晒，收租股升幅更加勁，港鐵咁多商場同寫字樓，淨係租金收入今年都升唔少。公司旗下地皮仲有將軍澳日出康城餘下6至10期、大圍站、天水圍輕鐵總站，政府亦已留咗黃竹坑塊地畀佢做南港島線發展。

港鐵係穩中取長之選，目標價雖然要保守啲，但今年要衝破舊年高位31.55元，應該唔難。

戰報

中國農產品交易（00149）+28%

帥哥上周二推介中國農產品交易時，低位只有0.46元，上周五股價高見0.59元，累計升幅28%。

第一視頻（00082）+12%

志強上月三十日指第一視頻重現魅力，當日低位2.38元，上周五曾高見2.68元，升幅達12%。

古勝