絲絲講場：雷曼苦主踩場 青姐講Talk腰斬
股評人胡孟青喺去年底話聽聞去證監會嘅示威人士係專業「粉絲」，引發嘅風波至今仍未完全平息，一班雷曼苦主尋日喺一個研討會上繼續衝擊青姐。
青姐原定尋日出席研討會，與現場觀眾講吓今年股市展望及投資機會，仲好有心機整晒Powerpoint，佢上台時已有人起哄，青姐仲笑笑口話：「依家唔係劉華演唱會喎。」點知輕鬆氣氛一瞬即逝，陸續有人在場大吵大嚷，又大叫「亂咁噏收二百蚊一日唔負責任」。
苦主火滾擾攘
此時台上青姐仲好淡定咁話，明白人有訴求好正常，不過就唔好擾亂個場，又指任何投資自己都要承擔責任，輸咗嘅話，喺邊度跌低就喺邊度企番起身，就連佢自己都喺九七年輸過咁話。
台下怒火撲極都唔熄，班苦主仲播埋佛經添，主辦單位惟有嗱嗱聲善意請青姐提早落台，最終個演講未到一半就腰斬咗。青姐都算有風度，雖然研討會期間曾有不歡場面，佢都坐到散場先走，算係咁喇。
余絲韻