絲絲講場：星展社企計劃撐中學生擺年宵
今年大家去維園行年宵時，話唔定會撞見星展香港行政總裁龐華毅（Sebastian），皆因星展資助咗6家中學嘅學生，與本地社企合作，喺維園年宵市場擺檔賣自家設計嘅產品。Sebastian見到班學生夠創意又有熱誠，話會親身去支持吓佢哋，仲約絲絲喺維園見添。
利潤全數捐社企
其實星展已經係第3屆搞呢個社企計劃，佢哋希望幫助社企之餘，亦培養學生嘅營商經驗，所以動員30幾名員工做義務導師，舉辦8場營商講座，單係今年已有1,500名學生接受培訓。所謂名師出高徒，參加者都好有營商智慧，去年收入最高嗰隊就做咗5萬蚊生意。絲絲仲八到，星展香港高級副總裁及企業理財中心主管江耀煇今年會親自擔任評審，與參加者分享經驗。
今次擺年宵所得利潤會捐晒畀社企，Sebastian話嚟緊係兔年，兔仔一向畀人活潑純潔嘅感覺，與呢班新世代好合襯，希望佢哋發揮營商潛能之餘，不忘繼續回饋社會。
余絲韻