絲絲講場：超人評經濟 港基調仍好
長和系尋晚舉行周年晚宴，主席李嘉誠一早就到場，集團員工好想知道佢點樣評論新一年經濟，「超人」致詞時就話，香港基調仲係好好，又繼續受惠於國家嘅高速發展，但始終會受到各種客觀因素影響，波動就難免喇！
「超人」都係勸喻大家，秉持「發展中不忘穩健、穩健中不忘發展」嘅宗旨，佢深信憑藉集團喺世界50多個國家業務嘅雄厚發展潛力、分布全球嘅24萬名勤奮員工以及財務實力，對集團嘅長遠發展前景充滿樂觀及信心。
通脹厲害 建築費貴咗
咁今年加人工及花紅又點呢？佢笑住咁話呢個問題最難答，集團下面有咁多唔同嘅生意，一般嚟講唔可以全部一視同仁，個距離差別好大咁話喎！
近排人人關心通脹殺埋身，買「磚頭」係咪穩陣啲？「超人」冇直接回應樓市走勢，只係話「要睇通脹厲唔厲害」，依家建築費亦一樣「貴咗」，依趨勢嚟睇，通脹一定「厲害啲」，因為「差唔多每個人都知樣樣嘢都貴咗」！
不評論分拆人民幣REIT
另一個關注點係，有傳長實會打頭陣分拆人民幣REIT，佢話唔可以評論，相信同事做緊嘅嘢應該做得幾好。
和黃（00013）股價近日好靚仔，「超人」就話要帶領公司做得更好，對得住啲股東係佢嘅責任，股價高低係市場需求嘅問題。咁會唔會增持集團股份呢？佢話睇番過去兩、三年都係咁，除咗係啲唔可以買嘅時間，佢一般都會增持自己公司嘅股票。問到市場有傳聞話和黃有意收購電訊盈科（00008），「超人」就再三強調咁話：「冇可能，冇啲咁嘅事！唔會嘅！」
雖然「超人」尋日唔係講好多嘢，但見到一班等緊佢嘅記者，就即時向大家講聲Happy New Year，仲邀請記者及攝記影張相，睇嚟似乎心情大靚！
余絲韻