作為一個實戰教育家，講名人故事教投資係最好用，今日，同大家分享一個日本投資名人嘅投資智慧，為大家二○一一年喺投資心理質素上作好準備。
是川銀藏，係日本無人不曉嘅股神；佢能夠由貧變富，跌倒後又可東山再起，皆因佢對自己同自己投資嘅公司嘅理財狀況十分關注。能知道自己同企業點樣理財嘅人，一定可以審慎管理財富，成為「一個硬幣」嘅主人。是川銀藏係日本著名嘅股票大師，喺日本股市縱橫拚搏六十年，創造無數奇迹。佢30歲時用70日圓做本錢入市，即獲利百倍，成為日本股市名人。
僅靠投資股市，佢喺八二年度日本個人所得排行榜中名列第一，八三年名列第二。佢百發百中嘅判斷力，預測經濟形勢同股市行情嘅準確性令人吃驚，被稱為「股市之神」。
是川銀藏珍藏一生嘅炒股秘訣有兩個──「只吃八分飽」同「烏龜三原則」，詳細解說咗培養個人判斷力嘅方法，同對炒股者嘅勸誡同忠告，被無數股民奉為炒股必讀嘅「聖經」。
「只吃八分飽」同一般理財原則好相似，唔求有燦爛嘅表現，只求小康；「理財」並唔係去建功立業，而係較創業更具一層深意──「守成」。先有一個現成嘅基業，先能夠再喺呢個基業上打天下；理財，就係去幫助大家建成呢個「基業」。「烏龜三原則」，寄語大家唔好似白兔仔一樣自滿，要好似烏龜一樣，一步一腳印；慢慢將資本累積，向財富小康之路邁進。二○一一年，喺炒股唔炒市嘅大前提下，一齊努力啦！
香港大學電子金融服務榮譽助理教授 徐燦傑