絲絲講場：中國教育部訪港答謝郭氏基金貢獻
大企業最緊要有企業良心，新地（00016）郭氏家族一直樂善好施，呢7年嚟向內地多間高等學府捐助，設立各類助學金及海外留學嘅碩士和博士獎學金，仲畀錢修葺文物，所以中國教育部前幾日專訪香港，多謝新地郭氏基金多年嚟對於推動教育及培育人才作出嘅貢獻。
3億資助內地教育
內地人才輩出，但係有才華又有志氣嘅年輕人如果想深造，好多時仲係會面對經濟壓力。絲絲曾聽聞有大學生想出國讀書，但家庭收入唔多，連考IELTS嘅錢都要左度右度先有。新地自○二年以嚟，喺清華、南京大學、復旦大學等多間大學設立獎學金，至今已資助學生超過5,000人，總金額達人民幣3億元，佢哋嘅慷慨資助真係幫到好多學子。教育除咗講求硬件，亦講求軟件，新地郭氏基金亦都喺文物保護方面出力，例如資助文物嘅修繕工程，仲畀錢培育文化及文物保護專業人才。
郭氏基金多方面推動教育事業，中國教育部特登嚟香港答謝郭氏基金，與新地董事郭婉儀、董事鄺準及新地管理層見面。絲絲聽聞新地個MT（見習管理人員）計劃亦好成功，睇嚟雙方可以就教育方法交流吓心得。
余絲韻