今年首批新股矚目
原本喺去年底招股嘅華銳，由於技術性因素要延後招股，因而成為咗今年滬市首批面世嘅新股，呢間公司係內地風電整機裝備嘅龍頭企業，所以好受注目，佢哋嘅發行價比起舊紀錄嘅神華足足多咗1.4倍，分分鐘喺掛牌後就即刻進身「百元俱樂部」添。
尉文淵係內地資本市場嘅大哥大，雖然佢當年因為「327國債事件」黯然落台，之後一直都好低調，但喺投資界仍然好活躍，淨係睇佢間接持有華銳股權嘅市值超過80億人仔，就知道佢嘅眼光獨到，而佢嘅老友、創投界名人闞治東揸住華銳嘅股份亦價值10.54億人仔。呢間公司背後有咁知名嘅股東，梗係多人講喇。
余絲韻