唔知大家仲記唔記得，絲絲曾經喺幾個月前講過，利豐（00494）或會因為紐約帝國大廈附近興建高樓，破壞風水，因而放棄租嗰度做辦公室。依家事件有最新進展嘞，市傳利豐日前經已與帝國大廈嘅業主簽咗租約，睇嚟更差嘅風水都敵唔過著名大廈嘅吸引力喎。
據《紐約郵報》所講，利豐喺去年第一季已經喺紐約周圍搵地方，今次以呎租45至50多美元，即約400港元樓下，租用帝國大廈多層合共約49萬呎樓面，全部集中喺大廈嘅低層位置，成為咗當地自去年以嚟最大宗嘅租務成交。
報道仲話，利豐最近喺當地買咗幾間公司，仲批出咗一啲產品授權，今次租用帝國大廈純粹係為咗擴張業務、大展拳腳，至於現時用緊嘅紐約百老匯區兩個辦公室，將會繼續保留。
咦？利豐似乎睇好今年美國嘅零售市道喎，唔通真係QE2開始發揮作用，帶起美國經濟？
余絲韻