市場熱線：國美開展新升浪

不過，老美復甦對新興市場唔係好事，大家肯定記得年尾美股一路升、中港股市陰陰跌嘅情景，一般解釋係資金由新興市場回流美國，尋日又出現類似情況，A股先升後跌，恒指亦倒跌過幾十點，但地主股實在太過強勁，令港股保得住7連升。

今年嘅趨勢同舊年相似：老美猛咁放水、大陸就收水，資金去一處受歡迎嘅地方好正常，但香港一方面資金冇掩雞籠兼港紙黐住美金、另方面魚缸則同內地一衣帶水，究竟何去何從？話事人當然係大戶，揸住把刀劏牛劏熊任揀。

建築股火燒冷灶

升幅榜裏面好多都係發霉股，祖國搞農村電網改造升級，東北電氣（00042）同成都電纜（01202）難得變主角。最特別嘅板塊係本地建築股，其實本地建築工程舊年已復甦，十大基建卒之開動，但做得呢類大型基建嘅受惠股，應屬龍頭嘅中國建築（03311），呢隻股舊年點犀利法唔使講；至於旗下有協興建築嘅新創建（00659），自從送紅股之後亦脫胎換骨；其他小型建築股最先升嘅係材料商高力（01118），跟住新昌營造（00404）連續3支大棍，卒之帶起埋俊和（00711）、有利（00406）、泰昇（00687）、盈信（00015）、利基（00240）之流。

曾幾何時，本地賣衫股亦係發霉不值一顧嘅類別，但結果由一隻I.T（00999）帶起炒足半年，依家仍然間中突擊炒作，呢類股咁多年冇人炒，貨乾似木乃伊，所以千祈唔好睇小。不過，賣衫股炒起的確有成績表支持，加埋自由行、金融海嘯減租、棉花價格下跌等天時地利人和因素，建築股今次升勢係開始抑或已經玩完，亦要睇成績表，好多隻睇番往績PE只係幾倍貨仔，似乎仲有水位。

講到零售股，本地薑舊年威過祖國貨，大陸舊年零售額增長18%，其實只係差過香港少少。但係起步點唔同，香港係由低炒起，祖國則一直已處於高位。不過，祖國零售股仍然好有前景。

國美（00493）舊年起落幾大，本來以為股東同管理層爭拗單嘢已一天都光晒，點知年尾傳出主席陳曉劈炮，股價最低跌到2.72元，啱啱補番十一月十一日嘅上升裂口；其後國美否認陳曉唔撈，又宣布換秘書以及同黃光裕旗下嘅非上市門店續約到出年底，股價於是重新上路，尋日瑞銀發報告將隻股評級「三級跳」，由「沽出」調高到「買入」，目標價睇3.5元，刺激股價升到2.96元收市。

和氣生財最緊要

瑞銀估計國美舊年第四季收入增長會加快到20%，原因係前一季嘅新店會提供貢獻，而今年會淨開多160間新舖，預計收入會增長14%，而翻新店舖會提高毛利率50點子。當然，董事局「河蟹」係重要因素，所謂和氣生財，齊齊搵錢好過鬥氣。國美未嗌交前PE一向係20倍樓上，現價係今年預測PE約18倍，升番一成以上亦係合理。

戰報

東岳集團（00189）+11%

古勝周一指東岳狀態甚勇，昨日更高見5.32元，以推介當日低位4.78元計，升幅已達11%。

華潤水泥（01313）+10%

帥哥周一指潤泥醞釀突破，當日低位5.73元，昨日以全日高位6.32元收市，升幅達一成。

古勝