近期有好多學府都會搵財金界猛人任教，絲絲聽講中銀國際董事總經理兼槓桿及結構融資部主管溫兆華（Wilson）喺早兩個月正式接受中大財務學系委任做客席教授，佢話之前搵過中大學生幫手，研究市場上嘅槓桿財務有乜變化，依家就返去教書，絲絲覺得佢咁做都算係投桃報李。
今次喺中大財務學系教書，Wilson將會教足3年，主要係教工商管理碩士課程，但依家未有正式課程，只係間中去講吓課，佢仲話未來會帶學生研究唔同課題，會喺不同部門做研究。
Wilson話喺大學教書，可認識一班年輕人及了解佢哋嘅諗法，佢哋未來又可能會係大公司嘅骨幹，甚至係自己公司同事，各方面都有得益，諗番起自己經過一段時間先成長，都希望幫到其他年輕人。Wilson呢種春風化雨嘅心態，唔做老師就真係浪費晒，第日Wilson返工除咗見到同事，仲可能見到自己嘅學生添。
（余絲韻）