合和（00054）一向都係灣仔區嘅地膽，嚟緊仲有多個大型發展項目，為咗加深商戶及市民嘅了解，提升項目租值及競爭力，絲絲知道佢哋動用咗7位數字金額，喺合和中心50樓首次搞咗個概念展覽館，解構灣仔區將來嘅變革。
絲絲尋日都有去合和中心嘅展覽館親身體驗，透過裏面嘅模型及觸控螢幕展示區，可以睇到未來灣仔區嘅發展及全新面貌；其中未來該區嘅焦點發展，相信會係發展為港島區首間會議酒店嘅合和中心二期。
合和資產管理董事梁庇世話合和中心二期最快喺今年中動工，二○一六年落成，提供1,024間客房；至於與信置（00083）合作嘅利東街商住項目，會建有全天候空調行人隧道，直達合和中心及港鐵灣仔站。
已經有30年歷史嘅合和中心，原來喺過去4年已用咗1.4億元維修，咁都未夠，遲啲仲會用接近億元為大廈外牆等做大翻新，再加埋灣仔區內未來將大變身，梁庇世相信未來一年合和中心寫字樓部分呎租可再升約一成。
（余絲韻）