社交網站Facebook（FB）無疑係好多人心目中嘅金蛋，早期嘅投資者帳面上已賺到盆滿缽滿，FB將來嘅發展係投資銀行家口中嘅肥肉，據聞高盛入股FB後，想將FB推介畀一班老主顧，FB財務總監David Ebersman仲幫手教埋高盛員工點樣推銷，咁又係嘅，賣得好價大家都有着數。
高盛近日夥拍俄羅斯私募基金DST入股社交網站FB嘅消息曝光，更傳出高盛會食過翻尋味，計劃成立特殊目的嘅公司（SPV），招攬一班私人銀行貴客齊齊入股FB，為FB額外集資15億美元。市傳高盛近日請嚟FB財務總監David Ebersman為旗下私人銀行部門嘅「賓卡」補習，以視像及電話方式教佢哋向上咗年紀嘅客戶解釋FB網站運作，等佢哋了解多啲先至投資。
行內人士估計，高盛咁認真除咗因為私銀客戶普遍年紀較大，需要人指導吓「賓卡」點樣推銷之外，更重要係高盛想做場好戲，等FB管理層見識到佢哋集資有幾叻，為將來FB首次公開招股揀保薦人嘅選秀會鋪路，盡早攞分咁話。又係喎！依家FB估值升到500億美元，IPO保薦包銷費用閒閒哋都成幾億美元，真係大茶飯嚟o架！
不過，FB會唔會揀上市呢條路就仲未知，要睇創辦人朱克伯格點計條數，FB股價喺私人交易所不斷咁升，已帶挈咗好多投資者，好似長實（00001）主席李嘉誠以私人身份或基金會投資咗一億美元喺FB，依家已升值好多。
（余絲韻）