踏入一一年，祝各粉絲繼續勤做功課，炒股炒贏市。通常每年第一篇文都係要做少少回顧先至似樣，扮大師咁話，估計花旗大國繼續推出一系列「印銀紙」活動，唔掂仲會買國債，其實咁樣做會令到市場嘅流動性大增，港股自然可以受惠唔少。
香港人最關心嘅梗係樓市，雖然政府上年「左一招，右一招」嚟打擊炒家，令樓市回調，但過咗成個月，交投水平又重返到出招前。講真，政府每次出招，其實可以拖一拖佢嘅升勢，但上升大方向始終未變。
同九七年高峰期比，港人嘅供樓負擔比率係高峰期嘅一半。最慘係今年供應偏低。供應斷層問題短期難以改善，加上祖國人民又大把水，人幣上升加強咗祖國人民嘅入市意欲，中期仍然樂觀。
阿爺政策，都係嗰句，不斷有內需政策出台，加強對「三農」同各老百姓消費嘅支援，同時又要令民企強起來，全力撐起民企嘅發展。加上「十二五」推出第一年，對唔同嘅板塊都係進行巨額投資同埋補貼，行業購併重組，祖國稱之為「結構性調整」，龍頭股梗係受惠。
喺咁嘅形勢下，炒股唔炒市絕對係上上策，買錯板塊好似買咗炸彈一樣，屍橫片地，通訊設備板塊、內地服裝零售、百貨股都要留意，所以由今日起，開始向呢幾個板塊做X光測試，繼續為大家一一年齊追蹤，一齊奪金。
香港大學電子金融服務榮譽助理教授 徐燦傑