絲絲講場：獲授股份輸變贏 李小加叻人遲出手？
港交所（00388）喺上月中宣布撥出1.213億元作為僱員股份獎勵計劃，其中720萬元會購買股份獎授行政總裁李小加作為長期獎勵，以當日港交所收市價每股183.2元計算，大約可買入3.93萬股。尋日聯交所資料就顯示，李小加申報喺去年最後一個交易日（上月三十一日）增持咗港交所4.0856萬股，以當日港交所收市價176.3元計算，涉資約720萬元。
絲絲唔知道係李小加抑或聯交所決定喺上月三十一日「出手」，但就係因為遲咗半個月「出手」，李小加可以買多千幾股港交所，唔好睇小呢千幾股，以尋日收市價179.8元計，足足相當於27.9萬元，更重要係若李小加喺上月中「出手」，到尋日都仲要輸錢，但等到月尾「出手」，即日賺14萬元，唔知佢下月派新年利是會唔會鬆手啲呢？
葉志衡三月離任
講開港交所，近年都有好幾位高層離職，佢哋尋日公布，集團副營運總裁葉志衡已決定辭職，轉職往投資管理行業發展，而為咗方便工作上嘅交接，葉氏將喺三月底才離任。葉志衡喺港交所做咗超過7年，期間先後帶領推行5位數字證券代號、印花稅繳收程序自動化、人民幣計價交易和結算嘅準備工作、發展結構性產品及交易所買賣基金市場等，港交所除咗感謝葉氏嘅寶貴貢獻，亦祝佢鵬程萬里。
余絲韻