早前抱恙嘅鄭海泉，今日會喺一個公開場合現身，邊個咁大面子請到佢光臨？就係由新世界發展（00017）興建嘅全港第一間教學酒店，人稱「彤叔」嘅鄭裕彤都會親自主持開業儀式。
去年鄭海泉請咗兩個月病假，但喺去年十月，佢好畀面出席一個公開場合，咁啱又係與中文大學有關。事緣滙豐保險及中文大學齊齊辦保險課程，鄭海泉唔單只係滙豐中國董事長及滙豐台灣區主席，佢亦係中大校董會主席，雙重身份，冇得推辭喇！當時絲絲見佢精神相當唔錯，但就清減咗，今次佢又再畀面中大，證明佢身體冇事啦。
呢間全港首創嘅教學酒店，為本港酒店及旅遊管理教育揭開新頁。教學酒店由新世界發展興建，分為酒店設施及教學設施兩部分，酒店部分由凱悅國際集團管理，面積達5萬平方米，除咗提供住宿、餐飲及商業服務外，亦為中大酒店及旅遊管理學院嘅學生提供實習機會；教學大樓就喺酒店毗鄰嘅「鄭裕彤樓」，內有食品實驗室及品酒實驗室，更設有由學生全面經營及管理嘅餐廳，充分實現理論及實務並重嘅理想商學教育模式。
余絲韻