絲絲講場：新地尖子兵團賀2011
二○一○年已經喺一片歡呼聲之中成為咗歷史，除夕夜當晚吸引咗幾十萬人喺維港兩岸一齊倒數，其實大家可以睇到咁靚嘅煙花，真係要多謝新地（00016）及恒地（00012）嘅贊助。原來新地已經係連續4年贊助呢個倒數活動，除夕夜佢哋仲特登請埋一班獲得集團獎學金嘅員工子女同埋屋企人一齊出席添！
做代表出席倒數活動嘅新地執董陳鉅源就話，佢哋今年特別成立「新地員工子女本科獎學金」，贊助有潛質嘅員工子女完成大學本科課程，今年一共贊助咗8人，喺呢個普天同慶嘅日子就請埋佢哋與屋企人一齊嚟倒數，迎接新一年。
關懷員工延展下一代
陳鉅源話呢個獎學金計劃，係新地堅持「以人為本」嘅信念，重視員工嘅福祉，並將關懷延展至員工嘅下一代，獎學金計劃為員工子女提供全期大學本科教育費資助，根據喺校內及公開試嘅成績、家庭財務狀況等因素作評估，選出最合適嘅學生予以獎勵。
除咗新地咁有心之外，當晚天氣咁凍，恒地「四叔」李兆基都親自嚟撐場，仲爆料話新抱徐子淇有咗第三胎喇！
余絲韻