市場熱線：中石化現價唔怕買

恒指尋日升400點，而且係連升4日，成交回升至532億元，芬佬放完假重新入市，和黃（00013）升得最多，3G、碼頭、石油、零售瓣瓣掂，沉咗咁多年卒之大翻身。

富士康有望追落後

其次升得最多嘅藍籌係富士康（02038），呢隻亦有翻身概念，今年唔通輪到富士康發威？其實工業股一○年表現絕對唔差，所謂人工、原材料成本同埋人仔升值壓力都冇乜影響，富士康已將廠房移去內陸，要追落後亦有條件。

A股尋日休市，美股上個月不斷創新高，月尾雖見疲態，但執筆時道指期貨升緊68點，唔通新一年又有新水湧到？尋日港股有另一項參考數據值得睇睇：有62隻股票創五十二周新高、得一隻創五十二周新低，經驗話畀你知：個市仲未見頂！

祖國話核研究有重大突破，可以將核廢料循環再用，鈾資源變相提升60倍。如果冇假大空嘅話，祖國未來核電發展就好暢通，但尋日相關股份好似中核（02302）同東氣（01072）逆市下跌，上氣（02727）同哈動（01133）只係微升。發展核電要好長期至有收成，但祖國若將核電比重提高到兩、三成已不得了。

尋日又係車股墊底，所有優惠踏入新一年乜都冇晒，中央明顯唔想經濟過熱，亦都講明以穩定物價放喺第一位，可以斷言阿爺今年仍然會鍊住樓市。當然，有心未必有力，內房股衰足成年，今年博反彈有一定值博率。

中海油（00883）係舊年最威藍籌，做上游能源單睇油價升就得，買中石油（00857）同中石化（00386）卻要為下游石化業務計數，尤其阿爺管住物價，有乜依郁好似○八年咁樣唔畀成品油加價就大鑊，所以孖屣對呢兩隻股有戒心可以理解，但亦正因想買貨都唔敢重手，故此佔六成係下游業務嘅中石化，一○年預測PE只係8倍樓下，環境因素造成該股被低估。

成品油價上調有理

如果阿爺想管制成品油價嘅話早就出手，相反上個月仲調升成品油價，因為○八年一役見過鬼都怕黑，搞到好多地方鬧油荒。橫掂依家就係唔想你買車揸車，汽油價高反而成為國策，再向的士公交提供補貼，對通脹其實影響輕微。依家最大問題係成品油定價機制仲未完善，22日4%嘅機制名存實亡，一直有消息話參考日數改為10日，但只聞樓梯響。

既然阿爺已將成品油價定性為「對通脹影響輕微」，估計成品油定價遲早要有新機制，趁中石化股價平上車，唔望發達，但勝在穩穩陣陣。

戰報

亨泰（00197）+7.5%

詩詩昨日推介的亨泰，以全日高位1.28元收市，按低位1.19元計，單日升幅7.5%。

昂納光通信（00877）+10%

股博士上月二十三日推介昂納，昨日股價反彈上5.66元，較推介當日低位5.16元，升幅接近一成。

古勝