孖妹缸湖遊：今年估市天堂與地獄

「駭論」一出散戶圍剿

邊個話今年恒指有機會低見12,000點？佢咪係敦沛金融期貨行政總裁丁世民（丁丁）囉！自古以來，人類都係鍾意聽好嘢多過衰嘢，難怪「丁丁」嘅「駭論」一出，隨即引嚟散戶「熱鬧」圍剿。孖妹眼利，某日睇到豐盛金融資產管理董事黃國英喺佢其中一個專欄中寫咗句「危言聳聽」……孖妹都係貪得意搵嘢講，所以希望兩位前輩千萬唔好介意，我哋年紀輕，不過都知道呢個世界上有好多事情都係「公說公有理，婆說婆有理」。講咗咁耐都口乾喇，不如大家睇吓佢哋對港股「天堂」與「地獄」嘅看法啦。

丁：敦沛金融期貨行政總裁丁世民

黃：豐盛金融資產管理董事黃國英

外圍三憂患計時炸彈

高妹：我發現唔少散戶都標籤你做新進港股大淡友，依家你仲話今年恒指最低會見12,000點，係真唔係架？

　丁：我要先澄清自己唔係大淡友，其實我估恒指有機會低見12,000點嘅機會率只有10%，原因係我覺得今年美國經濟疲弱、失業率持續上升；歐洲債務危機惡化，甚至有國家真係會「爆煲」；中國加強力度調控資產價格，壓抑經濟過熱。若然呢三大因素同時出現，咁恒指先有可能喺今年第三季跌至12,000點低位。

祺祺：等我又問吓黃國英點睇先，你一向都唔鍾意估恒指目標價，咁你係咪睇好今年港股走勢？

　黃：都睇好架！我唔覺得恒指會跌落12,000點，因為資產價格要咁樣跌法，就一定要有人肯大量沽出股票。歐美經濟可能係仲有隱憂，不過好多散戶「見過鬼怕黑」，大家吸取過教訓，自然會做足投資安全措施，滙控（00005）都唔會再低見33蚊喇！但我認為今年恒指仍然會有幾個大波浪出現，上下波幅最少有6,000點，我睇恒指高位約係25,000點，支持位就係19,000點。

前車可鑑 冇咁易冧

高妹：「丁丁」，不如你再解釋多少少呢三大因素，等我哋可以細心研究吓嘛。

　丁：美國有幾個問題，包括樓價繼續下滑，就業市場復甦力弱，我估失業率會超過11%；近期債市及其相關ETF亦急挫至17個月低位，市政府債券隨時「爆煲」，令美國很多州份面臨破產邊緣；亦有數據顯示，美國有近八成公司有負債危機。至於歐債，我估葡萄牙最有可能「爆煲」，「歐豬五國」負債率持續高企，市場有機會再以「歐元解體」為藉口炒多一轉。中國通脹嚴重，中央會加大力度控制資產價格上升，我估今年內地至少加息5次先夠。另外，貿易戰、貨幣戰持續，所以今年問題仍然好多。

祺祺：聽「丁丁」詳細講解後，危機又真係好似好大喎！

　黃：我始終相信，資產價格要瘋狂咁暴瀉，必要條件係持有資產嘅人願意賤價拋售。你冇可能話今年經濟轉差，於是向老闆講不如今年賺少啲，皆因做生意就係要賺錢。至於美國失業率，好似搵工網MWW嘅搜尋率上升，可見當地就業市場前景正在改善。再舉個例，之前港府出招打壓樓市，市場預期樓價要跌兩成，不過啲炒家願意坐貨，坐到樓價上番去，咁你都冇符架！如果大家真係咁弱不禁風，有咁多次股災經驗都畀人「做瓜」，咁就抵死喇。

最驚國策 首季睇淡

高妹：「丁丁」你話過兔年令你諗起花木蘭，因為唔知佢係男定女，港股唔知牛定熊，呢個講法真係有趣。

　丁：冇錯！當然我都唔想自己估中，恒指真係會見12,000點。不過今年隱憂重重，我依然保持睇法，恒指未來3個月或會跌穿22,000點，低見21,800至21,900點，之後就重拾升軌，高位係25,000點，總之大家入市要小心喇！

祺祺：過去一年你做過27次推介，當中有23次錄得正回報，不如你都畀啲投資建議散戶喇。

　黃：講真吖，我唔擔心歐美經濟影響港股，反而係驚中國嘅打壓招數，因為市場未見過，唔知力度會去到幾大，一旦過咗火位咁就唔好喇。至於投資建議，今年嘅態度係「攻中保守」，我認為一月份港股會先抽高，然後再落，第一季整體情況會差啲。

聽完兩位財金專家嘅意見，孖妹覺得佢哋真係各有道理，所以散戶全部聽晒入耳，記喺心中就最好喇。炒股幾年，孖妹覺得投資係快樂嘅，因為可以從中獲取成功感，不過就唔好太過執着，忘記自己最初嘅投資目的，繼而因小失大。新一年新開始，孖妹預祝大家今年賺個盆滿缽滿喇！

23%人估恒指今年破3萬關

踏入新一年，多家大行已對二○一一年港股表現作出預測，恒指目標由26,500至33,917點不等。你認為今年恒指最高可見多少？據今期《東方產經》網上民意調查，截至上周末晚上6時嘅結果顯示，23.4%人選擇「30,000至34,000點」，63.3%人選擇「23,000至29,999點」，而選擇「18,000至22,999點」嘅就佔13.3%。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk