市場熱線：東岳估值仍然合理

舊年買內房股肯定冇運行，資源股好似係大贏家，但其實不然，仲要睇你有冇揀啱股。金股以為揀龍頭紫金（02899）冇錯，結果跑出嘅係招金（01818）；買煤炭股只發一隻兗煤（01171），金屬股益江銅（00358）、唔益中鋁（02600），買咗鋼鐵股更加冇眼睇。又以車股為例，買着吉利（00175）同比亞迪（01211）喊得一句句，但買咗華晨（01114）同長汽（02333）就倍數上升，揀啱板塊不如揀啱股。

海爾電器悶聲發財

老古眼中一○年嘅股王係海爾（01169），雖然計年度升幅唔算多，但跨年度升幅則達10倍，而且期間唔算有太大震盪，總之長揸笑呵呵。呢隻股係「悶聲發大財」嘅例子，一直傳聞佢會搞零售，結果到派成績表先知，間公司靜靜雞做咗分銷，跟住做埋物流，證明股票要升嘅唔使打鑼打鼓叫人捧場。

另一電器股志高（00449）呢排亦無比犀利，公司立下鴻圖大計，話5至10年內要成為產值千億嘅世界級企業，要達到呢個目標，每年收入增長要達三至四成，佢嘅新冷氣機標榜唯一運用「CU+銅抑菌」殺菌技術，1匹機都賣到6,000人民幣。當然，隻股呢排升咗咁多，仲追唔追得過，要留番畀自己考慮。

新材料股異軍突起

講番除夕個市，成交超過300億元已多過平安夜嗰日，但粉飾窗櫥效應加埋斷估今日開紅盤，恒指只係升36點較令人失望，而且期指仲低水15點。港股收市後，滬綜指下晝升48.5點，以全日高位收市，今日紅盤高開機會仍好大。

回顧總比展望容易，年年都有好多不明朗因素，歐債危機會唔會吹到鬥牛國甚至法蘭西？花旗地方債瀕臨爆煲係人都知，但好似冇人理，會唔會有QE3？祖國會加幾多次息？大孖沙估恒指會升到3萬點，講錯咗連sorry都唔使講，估中咗就可大吹大擂。

今年係「十二五」規劃第1年，孖屐炒太陽能唔炒風電，另一新意思係新材料股，你唔知係乜嘅就係新材料，海東青（02228）同思嘉（01863）兩隻新股異軍突起，○七年尾上市嘅東岳（00189）舊年全年升2.37倍。

東岳嘅產品包括製冷劑、高分子材料同有機硅，以前叫做業務冷門冇人吼，但依家變身做新材料就成為搶手貨。製冷劑主要用途係冷氣、雪櫃同汽車等，在國策支持下，舊年白家電同汽車都好賣，所以公司上半年賺多3.3倍。

據講佢嘅新產品全氟離子膜物料會係未來增長點，可應用於電動車「燃料電池」之核心材料。東岳今年預測市盈率15倍幾，起碼份全年成績表唔使憂，短線炒新材料概念又未完，希望各位讀者新年有個好開始！

戰報

寶威控股（00024）+10%

上周四高仁指寶威投資價值不俗，當日低位0.47元，周五股價一度升上0.52元，短短兩日升幅逾一成。

中銅資源（00476）+18%

古晨周四指中銅反覆向上，周五繼續做好，並一度升上0.85元高位，較推介當日低位0.72元升18%。

古勝