樓市過熱明年底冧
現時本港樓價與通脹數字高企，雷賢達亦甚表關心這影響民生的兩大議題。他指出，本港樓市已處於非常過熱時期，相信未來市場仍會持續超低利率一段時期，熱錢流入勢將增長資產泡沫的形成，若樓價再創高位，只會招致政府推出更強硬手段干預。
遏炒勢加辣 通脹失控
他續指：「樓市循環周期約為10年，本港樓價由二○○○年開始上升，二○一○年應該行完一個循環，我估計資產泡沫好大機會喺二○一二年底或一三年爆破，屆時會出現好多後遺症，貨幣貶值會導致通脹率上升，再推高債市孳息率，嗰時嘅情況已經唔係政府可以控制，市場自然會逼你收緊，當股市大跌，大家都會好痛苦。」
至於抗通脹方法？雷賢達便一臉認真地說：「無咩可以做，惟有叫老闆加人工。企業生意好、賺到錢，咁就應該再分啲畀員工。」眼見現時銀行存款利率近乎零，他亦有感而發：「以前退休人士將幾百萬元放喺銀行收息，利用每個月嘅利息收入做生活費，但係依家銀行存款利息都唔夠佢哋食一餐飯，咁對存款人士好唔公平，同時令貧富懸殊更加嚴重。」
籲港府發退休債助長者
對此，雷賢達便提議政府應盡快發行兩年期債券，票面年息2.5厘，最高認購額為50萬至100萬元，供身份證上具有三顆星的香港退休人士或高齡人士認購，以協助他們改善退休後的生活質素。另外，銀行亦應提高按揭息率，針對炒樓人士，利用所得息率差價利潤作為提高存款利息用途，基本年利率為2厘。