呢幾年，智能手機市場嘅急速增長係「避無可避」。喺呢個科技一日千里嘅世代，倘若自己用緊嘅電話冇輕觸式屏幕，恐怕好容易畀人覺得自己追唔上潮流。
智能手機嘅強勢崛起，最直接受惠嘅除咗係各大手機生產商，例如係蘋果公司同諾基亞之外，其他製造相關配件嘅供應商亦可以相繼受惠，瑞聲聲學（02018）就係其中一間值得留意嘅上市公司。瑞聲嘅市場定位係要成為全球微型聲學器件嘅頂尖技術整體解決方案供應商之一，一貫採納縱向整合模式，負責設計、製造同分銷一應俱全嘅高科技電子產品（例如：受話器、揚聲器、MP3播放器同電子書閱讀器等）。
受惠於唔少公司紛紛推出大受歡迎嘅智能手機同平板電腦，今年第四季電子產品零售市場持續熾熱，有利瑞聲嘅發展。
由於瑞聲聲學受惠包括蘋果公司、諾基亞同亞馬遜等主要客戶今年末季對瑞聲零件需求強勁，有信心佢第四季銷售可達按季增長10%目標，並創季度盈利同收入新高。
同時，預計瑞聲一一年首季銷售都會高於一般季節達9.87億元人民幣，按年升65%。此外，瑞聲主要歐洲競爭對手近期獲收購，有望受惠於行業整合，有利長線發展。
睇到瑞聲基本業務依然強勁，大行將佢下年每股盈測調升至1.16元人民幣。同時，將六個月目標價調升至25.68元，相等於下年預測市盈率19倍，繼續追蹤先。
香港大學電子金融服務榮譽助理教授 徐燦傑