股壇有明燈，內地傳媒就幫財經界選咗一班「黑嘴」出嚟，由於上榜嘅都係國際級投資大師，所以就畀個名佢哋，叫做「洋黑嘴」。投資大師經常會發表市場睇法，但若然散戶照跟，分分鐘會蝕到入肉，《證券時報》就搵咗幾個例子，整咗個「洋黑嘴」榜，巴菲特、羅傑斯、魯比尼及索羅斯都榜上有名。
「商品大王」羅傑斯喺今年三月時話，英鎊可能喺數周後就崩潰，但英鎊匯價喺其後數周就反彈500點子；索羅斯就睇淡歐元，佢話未來歐元體系可能全面崩潰，起初係好準，點知後來歐元反彈，佢就反口話歐元唔會消失；最過分嘅係佢話「黃金係終極泡沫」，但原來佢持有全球最大嘅黃金ETF共470萬股，係投資組合嘅最重倉。
「股神」巴菲特就「衰在」睇好比亞迪（01211），佢喺九月初到中國時大大聲話唔會沽比亞迪股份，但之後該股受銷售量問題拖累而急跌，《證券時報》話巴菲特喺8蚊入股，點都係賺，最慘嘅只係聽咗佢支笛嘅散戶。
至於「末日博士」魯比尼亦係口不對心，佢剛啱話對美國房地產市場一定會再次觸底，幾日之後，佢就靜雞雞買咗套豪宅，瓜田李下，難免被人質疑係「黑嘴」。
余絲韻