市場熱線：江銅可發力追落後

其實港股尋日都有條件上升，人仔連升8日創咗新高，國企股一路跑贏大市，飛機股即刻識飛，加埋年尾唔多唔少有啲粉飾窗櫥活動，好友乘機反攻。但利淡消息係港匯仍偏弱，滙豐中國採購經理指數亦回落，形成好淡爭持。恒指月頭同月尾計其實原地踏步，上個月亦都一樣，不過股仔就大上大落。

叁龍貨乾期波動大

叁龍（00329）尋朝最多升1倍幾真係誇張，原來係1供20除權日，供股喺七月公布，5個半月後先除淨，20倍數嘅新股喺二月十一日至出籠；財技嘅嘢各師各法，有啲公司供股快刀斬亂蔴，叁龍拖咁耐較為少見。

大比例供股同大比例送紅股道理一樣，未來個幾月係「貨乾」時期，舞高弄低都咁容易。

零售業靠祖國同胞

玩呢類股食得鹹魚抵得渴，呢排升得最勁嘅兩隻股：龍新能源（00395）同安芯（01149）都大幅回吐，前者開波創完1.46元新高之後，一度大跌到0.76元，收市又上番1.16元，接「下墮中之刀子」要夠膽識同身手，隻股今年4度批股，作價由0.324元至0.498元，接貨者點掟都有大把利潤在手。

零售股又再炒過，「股壇長毛」增持包浩斯（00483）為賣衫股壯行色，威高（01173）升8.64%。

孖屐喺十一月零售數據公布前偷步入市，不過十一月銷貨值升17.9%，升幅少過之前10個月，有少少捉錯用神。雖然聖誕商場大收旺場，但政府統計話香港人實質工資係負數，零售要靠晒祖國同胞。

古勝尋日推介金屬股洛陽鉬業（03993）表現唔錯，今日再投孖屐所好，推介江西銅業（00358），一字咁淺——倫敦期銅創咗每噸9,550美金新高，好快就衝破1萬大關；上海銅價尋日亦升2.43%，報70,820人仔，創超過3年來新高，比其他金屬率先升穿十一月物價管制措施出台前高位。阿爺想㩒住物價上升真係好難，溫情總理心中條刺有排拮。

需求帶動推高銅價

江銅H股尋日升2.45%收報25.1元，A股升3.5%收報41.99元人仔。出年銅會供不應求，預測精煉銅將短缺43.5萬噸，而金屬價升亦多咗人買ETF，工業同投資需求可望帶動銅價進一步上升。

江銅今年電解銅產量達90萬噸，未來會增產到100萬噸以上，同時又投資阿富汗艾拿克銅礦及加拿大北秘魯銅業公司。如果出年銅價真係突破1萬美金嘅話，佢出年預測PE只係12倍幾。

戰報

漢登控股（00448）+9%

帥哥周二建議趁回落吸納漢登，當日低位2.15元，昨日股價高見2.35元，累計升幅9.3%。

洛陽鉬業（03993）+7%

古勝尋日推介的洛鉬顯著做好，更一度升上7.28元高位，以低位6.81元計，單日升幅接近7%。

古勝