好多人都會搵基金經理幫手投資，但大家又係點樣揀選基金經理嘅呢？可能大家都會話，當然係睇基金經理過去嘅成績表，即係旗下基金回報。不過絲絲喺《華爾街日報》睇到一篇幾搞鬼嘅報道，話美國有位聯邦調查局（FBI）前成員嘅心理學家，運用佢嘅專長查找騙人嘅基金經理。
呢位叫伊麗莎白嘅心理學家，之前主要幫國家查找黑手黨及恐怖分子，離開咗聯邦調查局後，依家就用佢對「金睛火眼」去幫機構投資者及其他有錢佬，測試吓邊個基金經理會係下一個「馬多夫」。
伊麗莎白主要透過觀察對方嘅微表情、坐姿、回答時嘅速度及用語等，不過佢話最準確嘅，就係只要能夠觀察到對方瞳孔嘅變化，就已經差唔多知道真相。已評估過50位基金經理嘅佢仲話，華爾街嘅金融大鱷往往比恐怖分子及黑手黨更識得講大話，睇嚟有「觀人於微」嘅能力，分分鐘成為日後投行請人嘅其中一項準則。
余絲韻