有內地朋友同絲絲講，話家陣個市資金充斥，加上高通脹，內地依家好似投資乜嘢都可以賺大錢，繼早排啲人癲到炒薑、蒜及豆，出現咗「蒜你狠」（算你狠）、「豆你玩」（逗你玩）及「薑你軍」（將你軍）呢啲潮語後，近期內地「投資界」潮語係「幣你狠」（比你狠），熱炒舊版人民幣，其中一九八○年版嘅50蚊人仔最高炒到3,500蚊人仔，炒高咗成70倍，令到好多一向收藏錢幣嘅人一朝發達，啲人仲話「一次過賺一百幾十萬嘅大有人在」，認真和味。
炒舊版人民幣唔係呢期至有，○六年已喺內地興起，但冇呢排咁癲，真正嘅高峰期喺今年九月，例如一張三版古幣水印貳元券，年初時只係950蚊，九月時已經炒到2,000幾蚊；八○年版貳元券年初時要13蚊，最高就升值到80蚊，啲銀紙如果係有相連號碼嘅話，叫價就愈高，搞到好多收藏錢幣嘅人將斷箱計嘅錢幣出貨。
專家奉勸提防施禁
炒錢幣嘅人仲話，收到風有人長期大量收購舊版人仔，不過炒還炒，啲專家都勸大家小心啲好，事關九七年時國家就試過出法規禁止非法買賣人民幣，搞到當時炒賣活動一時之間水盡鵝飛，好多人損失慘重！
余絲韻