憑住成龍「動L」廣告打出名堂嘅霸王集團（01338），喺舊年成功上市，仲一度因為凍資超過660億元而成為「凍資王」；挾住強勁嘅聲勢，佢嘅股價仲曾經喺一年之內高飛到6.3元水平，遠遠高過佢嘅招股價2.38元。
可惜好景不常，自從今年七月傳出霸王旗下洗頭水含有可致癌物質二惡烷以嚟，投資者對佢嘅信心就變得十分冷淡，其股價仲不斷拾級而下；公司最近仲發出盈警，指出集團今年七月至十月期間營業額按年下降大約31%，股價進一步受到沽壓，近日仲失守咗3元嘅支持位。
消息指，霸王目前手頭現金仲有差唔多15億元人民幣，財政狀況都算穩健；而且有分銷管道調查顯示，霸王洗髮水銷售情況已經去番危機爆發前大約60%水平，預料佢嘅產品銷售喺明年下半年有望回復危機前水平。
霸王不斷致力開拓新產品，試圖分散銷售風險。霸王亦不惜重金禮聘甄子丹做佢旗下霸王涼茶嘅代言人。據某大行引述霸王管理層指出，預期霸王推出涼茶業務會喺年底達致收支平衡，為公司引入新嘅現金流。
此外，霸王計劃今年年底或者明年初推出家庭清潔用品品牌「高醫生」，進一步深入內需市場嘅陣地。如今霸王四面楚歌時，未知各位「江東父老」會唔會再畀機會呢位昔日叱咤一時嘅王者喺一一年「捲土重來」，再顯神通呢？
香港大學電子金融服務榮譽助理教授 徐燦傑