早幾年凱雷買咗台灣東森媒體科技，後來改埋名叫凱擘。但玩咗3年後，一直恨做有線電視大佬嘅富邦集團蔡家，出高價向凱雷買晒凱擘嘅股份。據講凱雷喺呢單「刁」大約賺咗92億元新台幣。
新台幣升值賺到盡
蔡家係以股份嚟換凱擘嘅股權，禁售期一完，最近忙於㩒住新台幣升勢嘅中央銀行好罕有咁高調宣布，凱雷嗰筆約13億美元嘅資金隨時可以匯走嘞。心水清嘅交易員就發現，凱雷當年去台灣時，新台幣兌美元匯率係32.5至33.1之間，依家已升到29.9。凱雷每1美元資金就賺到2.5至3元新台幣，即係話佢哋淨係匯水就賺超過30億元新台幣，今次真係賺到盡嘞。
余絲韻