絲絲與中石化（00386）老友飯局時，講開佢哋前董事長、現任工業和信息化部部長李毅中，老友話李部長喺中石化做董事長開始一直都冇好好休息過，家陣佢年過65歲已屆退休年齡，相信喺明年三月後就會退休，雖然仲未知佢退休第一件事會做乜，但就一定可以好好歎番碗佢嘅至愛──蘭州牛肉麵嘞！
絲絲仲記得喺○○年中石化來港掛牌上市嗰日，李毅中馬不停蹄咁見完投資者又見記者，到好夜先醒起冇嘢落肚，但就好想食蘭州牛肉麵，於是與同事周圍搵食，最終食唔食到就唔知，但據絲絲所知當年銅鑼灣的確有一檔蘭州牛肉麵，好多中資國企話事人周時去幫襯以解「鄉愁」，不過唔知係咪因為國企「走出去」嘅同時，啲話事人都食貫中西，唔會特登去搵啲地道小菜。絲絲以前都與中聯通（00762）董事長楊賢足嘅秘書去嗰度食過，佢當時好似發現寶藏咁推介呢家係最正宗嘅蘭州麵店。
講番李部長，早前中組部就宣布佢退咗工信部黨組書記嘅職務，搵咗苗圩接替，按慣例通常部長會同時兼任黨組書記職務，依家先退其中一職，相信好快會全身而退囉。
余絲韻