絲絲講場：城電花紅平均1.9個月人工
每逢年尾，打工仔最關心嘅相信係花紅有冇着落，對於業績有增長嘅公司嚟講，更加係提高公司形象嘅機會，好似「電訊魔童」王維基掌舵嘅城電（01137），今年平均每名員工獲派1.9個月人工嘅花紅，城電管理層今年亦有新招，員工原來可以選擇將半個月花紅兌換為最多10日嘅有薪年假，為獲犒賞員工提供多一個彈性選擇。
無可否認，王維基與城電喺過去幾年一直努力建立「良心僱主」嘅形象，至於成績係點相信只有城電員工先有資格評論。
113萬金幣賞老臣子
講番今年所派花紅，城電話評級表現最好嘅員工，最多可獲2.5至5個月薪金做花紅，不過有賞亦有罰，評級最差嘅5%員工唔單只花紅免問，分分鐘會畀公司送上「大信封」！
城電成立至今已經18年，派「老人牌」當然亦係公司犒賞員工另一例牌項目，城電就話喺今年嘅聖誕聚餐，公司向180位長期服務員工派咗總值113萬元嘅金幣做「老人牌」，可見城電成立至今確係有一班老臣子追隨。
余絲韻