絲絲講場：梁太化身DJ賀X'mas
恒生銀行（00011）「女大班」梁高美懿自上任以來，一直致力與員工打好關係，除咗喺內聯網寫Blog以及喺內部通訊內分享個人經歷和感受之外，最近佢就化身DJ，藉《晨早廣播》向員工祝賀聖誕。
點播《白色聖誕》有內涵
恒生每朝開工之前，都會喺公司內播放《晨早廣播》，內容主要係最新嘅銀行及社會資訊，又或者重申員工重要守則等，亦會為員工送上康樂活動嘅資料。今次梁太就趁住聖誕佳節，藉住呢個空中平台為員工送上節日嘅祝福，仲點咗首《White Christmas》（白色聖誕）歌曲畀員工聽，叫大家趁假期放低工作，陪伴家人共度佳節。
其實梁太喺公司內聯網嘅《CEO Blog》內，亦經常分享成長嘅經歷、與屋企人遊歷時發現嘅點滴等，證明佢係一個家庭觀念好重嘅人。今次佢點播《White Christmas》可謂非常對題，話說呢首歌寫於第二次世界大戰時期，歌詞以第一身去夢想過一個既溫暖又溫馨嘅白色聖誕，歌曲當年觸動咗打緊仗嘅將士，人人都想戰爭盡快結束，快快返屋企享受天倫之樂。絲絲都希望每一位聽呢首歌嘅人，放完假叉完電，可以重新有力再拚搏啦。
梁太有溫情嘅一面，亦有剛強嘅另一面，佢被英國《金融時報》選為「最傑出商界女性」，榜內人物雖然只係子公司嘅高層，未符合該報「全球商界女性50強」嘅條件，但肯定全部都係所屬領域嘅精英，梁太亦喺去年獲《福布斯》封為「亞洲最值得關注的女性」之一。
余絲韻