市場熱線：銀建潛在價值高

孖屐乏炒作焦點

恒指昨日跌142點，收報22,902點，成交金額439億元。港股成個上晝幾乎靜止不動，但喺A股收市後，到3點3沽盤先殺到，又係蠱惑陰濕格。

雖然跌百幾點唔算多，不過孖屐氣氛都幾差，只係得水股普遍升一、兩個巴仙，其一原因係北控水務（00371）供股注資叫好叫座，另一原因係《一號文件》用水利改革做主題曲，但其實講嘅係農田灌溉，主要受惠股應係水泥、水管呢類設備。

古勝話中聯重科（01157）買得過，喺尋日冇乜股好炒之下，隻股首日掛牌即升8%，如果開市買入嘅話，即日可賺約6%，但佢A股同日跌2%，計落已冇乜折讓，所以H股也不能太貪心，要部署「速食」。新股係威係勢唔作得準，同係先A後H嘅金風科技（02208）亦只得剎那光輝，近日老美向WTO抗議中國向風電同太陽能設備出口提供補貼，將係另一個打擊。

尋日其中一隻養眼股係峻凌國際（01997），折讓19%批股畀細摩在內嘅三個「芬」，股價再升11%，即係接貨者單日帳面賺超過三成。

不過，批得嗰1,500萬股，平均每個「芬」得500萬股，唔合佢哋「大雞唔食細米」嘅胃口；另一離奇嘅係隻股今個月股價升咗43%，理由係十一月份收入急升32%，峻凌一至十月增長幅度一路減慢，但十一月突然回升又唔知乜原因？係咪有新定單？抑或十月部分定單延至十一月交貨？

投資組合回報豐

另一隻養眼股係銀建國際（00171），一升就7.3%，睇開呢隻股嘅朋友都知道佢可以長時間唔郁，亦可以升到你唔信，古勝喺十月初推介時嘅評語亦係「可塑性強」，中廣核入股之後已變咗半隻能源股，如果發展核能嘅話亦大條道理，另外揸住11億元投資組合隨時禾稈冚珍珠，好似所持永暉焦煤（01733）股份帳面已賺4.7億元，銀聯如果上市更加襟計。

銀建亦計劃擴充石油化工業務，包括重油製烯煙裝置、煉油產能同加氫潤滑油裝置。「女股神」劉央都揀咗佢為愛股之一，認為間公司雖然透明度唔高，但經佢深入分析之後覺得公司3項業務都做得唔錯。

銀建的確股東背景同業務都幾複雜，但通常神神秘秘先有得炒，因為大家都唔知道佢真正價值係幾多。無論如何，銀建落到2.4元兩度反彈，應係無寶不落，潛在價值唔可睇小。

戰報

華耐控股（01020）+10%

古晨上周五指華耐醞釀升浪，昨日一度高見1.46元，較推介當日低位1.32元升10.6%。

峻凌國際（01997）+26%

本月六日帥哥推介峻凌，當日低位3.93元，近兩日顯著攀升，昨高見4.98元，累升26.7%。

古勝