據英國《金融時報》報道，華爾街大佬高盛炒房一哥、全球坐盤交易部主管施家文（Morgan Sze）擬另起爐灶，喺香港成立對沖基金，初期料最少集資10億美元（約78億港元）。聽講呢隻基金約75%資本會投資喺亞洲，原本隸屬施家文旗下嘅高盛亞洲坐盤交易團隊就會齊齊過檔一齊打造新基金。
今年開始，對沖基金紛紛喺亞洲「開檔」，主要係覷準區內特別係阿爺嘅經濟增長前景秀麗，加上區內部分國家稅率偏低，投資市場發展方興未艾，進駐區內搵銀絕對「有啖好食」。加上歐美喺金融海嘯後加強金融業監管，嚴查對沖基金內幕交易，亦係另一個誘發業界東移到亞洲覓食嘅原因。
對沖基金其實係一種集體投資計劃，由唔同投資者資金匯集而成，然後交由基金經理依循某個共同嘅投資目標嚟管理，對沖基金又叫「避險基金」或「另類基金」，市場對於對沖基金並冇劃一定義，一般嚟講，對沖基金嘅投資模式好多元化，主要靠策略性操作，包括環球宏觀、長短倉、危難證券、投資衍生商品等方式，同傳統基金藉由市場本身增值唔同。
對沖基金之基金經理除咗可買進、沽空能源相關公司嘅股票外，又可透過投資石油、天然氣等實質能源嘅期貨同期權，嚟達到直接投資呢類商品市場嘅目的，以提升基金表現同管理相關風險，所以，各粉絲喺投資對沖基金前，都係清楚了解本身嘅投資需要同嗰啲基金合唔合乎閣下嘅投資需要。
香港大學電子金融服務榮譽助理教授 徐燦傑