周文耀讚老友顧家
許照中一向與周文耀好老友，周文耀更上台恭喜老友及祝福一對新人。平時嚴肅嘅周文耀當日好幽默，開玩笑叫新郎哥唔好學外父……成日掛住打Golf，之後就兜番，大讚許照中係一個顧家嘅人，又好錫兩個寶貝女，逗得許照中好開心，引嚟全場掌聲。許照中話，今次婚宴由於只擺18圍，親戚已佔咗10圍，所以好多金融及證券界好友未能一一邀請，就連港交所董事局都冇請到，佢話要講句唔好意思呢。
許照中自爆細女幾年前出嫁，心情激動，今次輪到大女出嫁，就覺得屋企又少咗個人，感覺間屋愈嚟愈大。絲絲見佢影全家福大合照時，抱住外孫一臉滿足，真係替佢高興！
余絲韻