今年經濟好咗，大家送聖誕禮物應該會較去年重手，國際資源（01051）尋日就宣布向副主席兼獨立非執行董事柯清輝授予一億份購股權，不過要「柯大俠」接納先作實喎，大俠同絲絲話，公司嘅好意佢梗係接受啦，但都要股東同意先得，佢仲話係一份聖誕大禮物添。
據公司解釋話，今年公司經歷重大挑戰，印尼Martabe項目嘅施工時間延期，期間柯大俠畀咗公司寶貴指導及意見，授予購股權係對佢嘅肯定，並藉此鼓勵佢繼續為公司貢獻。其實國際資源都算係咁，因為集團主席趙渡早前為咗印尼項目延期而唔收人工，依家又因為呢個項目授出認股權畀大俠，算係一位有承擔嘅老闆。
既然國際資源咁認同柯大俠嘅貢獻，絲絲問大俠會唔會直頭轉埋做執行董事，可以為公司投入更多？大俠就話唔會考慮住，因為佢都係想花時間為中策（00235）搵新投資項目先，佢話中策依家有好多項目睇緊，但暫時未有落實。咁佢會唔會出埠過聖誕？大俠就話暫時仲未計劃，唔通佢真係忙到連假期都唔得閒安排節目？
余絲韻