滙控（00005）行政總裁紀勤即將喺年尾卸任，據聞家陣佢已飛返老家英國，不過唔好以為佢退下來後會好得閒，原來有個非常「艱巨」嘅任務等緊佢，就係減肥。咪以為只係求減幾磅，佢嘅目標係減20公斤（即44磅），約相等於4包家庭裝泰國香米咁重。為咗證明決心，紀勤仲同人打賭，輸咗嘅要捐100萬元畀慈善團體，而佢嘅減肥大計其中一站，就係十一月參加紐約馬拉松。
講到37年嘅滙控生涯，紀勤話前主席浦偉士正直、有膽識，係影響佢最深，亦係佢最敬重嘅人，佢又話浦偉士無論對官還是對員工，為人直率，個性同佢好似喎。咁佢與滙控係咪因主席一職而不歡而散？佢嘅答案係剛啱相反，佢話從來冇以辭職作脅，早喺七月已經知道自己唔會做主席。
紀勤仲話，當佢知道董事會屬意范智簾做主席時，仲講咗句「Good Choice」，更提議董事會晉升歐智華做行政總裁，佢話董事會想佢留多幾年幫手，不過佢認為係時候諗吓個人問題，所以冇答應。快將離任，佢話冇遺憾，對前景充滿期待。
佢仲自爆話當年係阿媽睇到滙豐請人廣告，幫佢寫埋信申請，於是一做就37年，曾駐守中東、新加坡，連旺角總行都做過。講起香港，佢真係有份深厚感情，前排絲絲喺尖沙咀Shopping時，赫然發現紀勤為一間珠寶店做開幕嘉賓，據講紀勤喺旺角返工嘅時期，已經與珠寶店老闆稔熟，睇嚟佢都幾念舊喎！
余絲韻