期指觀瀾：期指高水走勢似喘穩
港股昨日下跌75點報22,639點，如果收市才看指數，以為又係平淡的一日。如果炒期指，即市的驚濤駭浪，收市真係要去買驚風散壓壓驚。
尋日期指開出22,690點，其後受A股愈跌愈多影響，十一點半前期指已推到落22,367點，現貨最低見過22,392點，22,400點收回價牛證被宰殺後，大市似乎搵到支持，尤其午市後南韓軍演告一段落，南北韓邊界「無事發生」，港股完全收復上午失地，期指一度升到22,742點，升穿早市高位。
期指高水59點是近期罕見，或多或少反映淡友在假期前最後一擊，可能在昨日早市完結。手上淡倉已按計劃在早市期指跌穿22,600點平掉，獲利近400點。至於23,200點的馬鞍式期權短倉，兩者期權金合計684點子，基於23,200點認沽大幅價外，莊家開價相當闊，如果現貨點數繼續停留在現水平，筆者已有持至結算的準備，當然最理想係反彈到23,200點變成在價期權贏到盡。
如果仍然想賭埋最後幾日，留意期指能否重返22,755點樓上，升穿的話，未來幾日有機會進一步逼近23,000點水平。
John Mullen