市場熱線：秦發購併壯大規模

大笨象（00005）腳軟跌穿80蚊，但幸得有祖國移動（00941）跌到250日線技術性反彈撐住。呢排係淡友得勢，好似「歐豬」危機、南韓軍演、A股下跌，都被放大踩多幾腳。

零售股回吐壓力大

不過，下晝的確好似有啲轉機，古勝對年尾幾日仍有啲期望，但最緊要係兩韓唔好擦槍走火。其實歐美魚缸仍係不斷創新高，老美要製造財富效應刺激消費，有乜唔妥亦會識得出口術，所以美股仍係偏強。

零售股尋日跌得幾甘，先講祖國嘅李寧（02331），第二季定單大倒退，累埋其他體育用品股齊齊跌；其實呢類股係幻想美麗、現實殘酷，全世界體育用品高度集中喺adidas同Nike兩大牌子，其他「名牌」唔係被淘汰就係被收購；祖國雖然人多，但咁多國產品牌自相殘殺，實有一部分戰死沙場，你估鬥開得多店舖就可以贏人咩！不過估唔到先「謝」嘅係李寧同中動向（03818）兩大龍頭。

本地零售股亦繼續有沽壓，古勝禮拜日逛商場人山人海，不問而知生意唔知幾好，連領匯（00823）嘅屋邨商場都話租旅遊巴車班大陸客來掃貨，香港聖誕零售市道估計會增長兩成。

不過，零售股炒到咁高PE正所謂高處不勝寒，而另一壓力係加租，莎莎（00178）話續約加租15%，但相信零售股仍係短線炒上落對象。

在下話隻新股百富（00327）有炒味，果然冇講錯，一開波已潛水，頭半粒鐘喺2.7元附近震貨，但下晝升到2.9元樓上，而佢阿媽高陽科技（00818）亦見異動。

今日有隻動物保健品（00940）以介紹形式上市，個名改到好似同「寵物」及「保健」有關，其實只係「獸藥」，業務太冷門玩唔過。

積極開拓上游業務

中國秦發（00866）係其中一隻強勢股，皆因計落佢今年預測PE都係10倍左右，睇落幾吸引，但如果佢淨係做煤炭貿易業務嘅話，一般貿易股其實只值幾倍PE，原因係業務風險大，而貨品價格升跌對貿易商盈利影響好大，好似上半年煤價大升，公司中期盈利亦因而大升18倍。

不過，秦發不斷收購煤礦進軍上游業務，上月就以16億人仔收購山西華美奧能源32%股權，早排又買船又買碼頭，已經唔係一隻貿易股咁簡單。睇番三隻國企煤炭股預測PE係12至14倍，秦發短期要追上佢哋係冇可能，但相信間公司會透過上市集資功能繼續壯大。隻股早排升上5蚊，再回落到4蚊，但並冇洩氣，睇落仲有可為。

戰報

中國金屬資源（08071）+24%

高仁上周三指中金資源突破在即，昨日逆市做好並創0.305元新高，累計升幅近24%。

儀征化纖（01033）+9%

帥哥上周二建議低吸儀征，當日低位3.82元，之後儀征反覆做好，昨高見4.17元，累升逾9%。

古勝