春秋航空係內地廉價航空公司，專幫乘客慳錢，原來佢哋嘅管理層平時對自己都好慳。據講管理層出差時好簡樸，有次大家去到機場搵唔到接董事長王正華架車，原來係因為車太舊，完全唔似用嚟接董事長；平時管理層出差都係坐火車，連軟臥錢都慳番，淨係買硬臥；最經典係有次要去倫敦出Trip，管理層一齊瞓地庫，幾個人一間房，之後再一齊去公園野餐，食自備嘅食物，仲要有相為證！
王董透露春秋現有21架飛機，好景時每架機盈利有1,500萬元人民幣，唔好景時都有400萬元。年中都有唔少投行引誘佢哋上市，王董話初時唔想IPO，因為自己冇乜負債，要去銀行借錢好易，但後來覺得上市係必經之路，打算等個市好啲，約喺二○一二或一三年於上海上市。
余絲韻