漢傳媒（00491）幾名前董事包括人稱「主席」嘅余錦基、余錦遠、王日祥（導演王晶）等早前被聯交所譴責，話佢哋違反上市規則，聯交所仲要佢哋參加有關遵守上市規則、董事職責及企業管治事宜嘅培訓，起初「主席」同絲絲講，話佢都唔諗住再做上市公司董事，所以應該唔會上呢個合共24小時嘅再培訓課程，點知漢傳媒上周就公布，話呢幾名前董事已經乖乖咁完成晒呢個再培訓課程。
絲絲梗係要打個電話問吓余錦基，佢話原本真係冇諗住去上堂，但佢細佬（余錦遠）及晶哥都話上，所以咪柴娃娃一齊去囉。絲絲心諗，主席就話冇諗住再做上市公司董事，所以唔想再培訓，但可能佢細佬及晶哥冇諗過咁快收山，所以幾大都要去培訓。絲絲問佢呢個課程係咪好悶，點知「主席」話，佢上完堂後覺得個課程原來都幾有用，又話課堂中講師用咗好多活生生嘅例子去講解，的確幫咗佢好多，真係活到老、學到老。
佢又講到今年唔會出埠過聖誕，皆因除咗佢媳婦年中生咗個男孫畀佢玩之外，最近佢位千金亦生咗男B，即係佢喺一年內多咗兩個男孫，有佢哋陪佢過聖誕，「主席」梗係邊度都唔想去啦。
余絲韻