市場熱線：瑞金升勢可持續

另外，祖國下個禮拜一公布CPI，呢個周末係加息嘅敏感時刻，但孖屐意見普遍認為「早加早着」。美股尋晚可能借住減稅單消息衝頂，奧巴馬果然屈服，延長有錢佬減稅計劃，老美欠落嘅14萬億美金債留番畀子子孫孫去還。

鐵礦石股借勢炒上

祖國錢莊股帶動魚缸回升，有消息話出年新增貸款係「7字頭」，貨幣政策雖話由適度寬鬆轉做穩健，但新增貸款由7.5萬億人仔減到7萬億只係小意思。滬綜指收市倒升0.65%，深成指則升1.89%，地主股表現幾好，因為話樓市價量齊升，對房產稅更加係冇有怕。

巴西鐵礦石生產商淡水河谷（06210）今日喺香港掛牌，開創咗香港預託證券先河。淡水河谷個名聽得多，但隔山買牛始終唔係散戶杯茶，依家海外市場買股已非大戶專利，有興趣嘅都識喺美國入貨。尋日鐵鈦（00893）同鐵貨（01029）都當影子股炒上，淡水河谷市值過萬億，同市值得幾十億嘅香港公司比，點比？

深圳放寬個人遊資格到常住人口，即係又多400萬人可以落香港shopping，所以零售股又有藉口再炒過。其實依家香港商場為咗爭大陸客，每日都搵旅遊巴車班米飯班主來掃貨。零售股每月總可炒幾次，喺低位買定貨等升都幾和味，但今年盈利基數已高嘅情況下，出年能唔能夠咁大賺有啲疑問。

古勝尋日提過金風科技（02208），有時就係咁「蹺」，你見佢日日跌諗住睇定啲先買貨，但佢突然宣布攞咗大定單，高開之後只好「送車尾」。同係大幅高開，勞氏環保（00309）倒跌一成幾收市。

金價升到1,423美元，仍然係大漲小回格局，前排有消息話中國會增加黃金儲備，祖國買金唔會咁張揚，但今年密密買確係事實，高盛估金價後年可升到1,750美元，買金不如買金股，有升值兼有息收。幾隻金股當中（唔計魚目混珠嘅細價金股），瑞金（00246）不嬲係估值最低嘅一間，當然要計埋市值同規模佢亦係最細。

中銀視為行業首選

不過，據瑞金嘅長期「粉絲」中銀所講，公司生產成本低、產量增長前景清晰，兼且財政狀況健康，所以係貴金屬行業當中首選，目標價15.98元，相當預測市帳率1.1倍。

講走勢，瑞金上個月曾升到最高15.78元，依家金價又創新高，瑞金好應該可重上呢個位。反觀，招金（01818）已比上月高位高一成有多，所以瑞金其實仲有上升空間，如果金價繼續升更加唔使講。

戰報

通達集團（00698）+9%

帥哥周一指通達估值吸引，當日低位0.38元，昨日股價高見0.415元，累積升幅9.2%。

中國安芯（01149）+20%

古晨上月二十四日推介中國安芯，昨創2.2元一年新高，以推介日低位1.82元計，累升20%。

古勝