多謝《東方日報》讀者群夠廣，七年前喺大學教過嘅學生由《東方日報》緣起，喺facebook度重新遇上，真開心！佢哋話無見我咁耐，講股一樣精彩，我話只係順應潮流，同我嘅名句「左圈帶動」（即係以大眾客戶需要為先）。不過佢哋話作為一個學者偶然間都應該對一啲金融時事作評論，所以今日同大家討論吓MPF。
MPF成立十年，你同我都喺有限嘅選擇下成為佢哋嘅粉絲。根據數據顯示，揸住MPF十年，基本上都可以打倒通脹，但如果以平均年化回報為5%嘅股票基金嚟講，就唔算好勁。講真MPF最大贏家梗係MPF公司啦！最大輸家係一眾低收入，但係要供款嘅星斗市民，七除八扣，無乜幾多剩，點過埋下半世啊？
講真，MPF理論上唔夠你退休就已經講咗好多次，自己一定要養成儲蓄嘅習慣，但要記住儲蓄嘅習慣仲要適當放喺合心水嘅投資產品上。有粉絲建議MPF加入巴西、俄羅斯呢類新興市場，講真佢哋增長動力確係好強，不過熱錢流嘅波動性又會非常大，加上佢哋有一個學名叫「單一國家基金」，單一國家唔符合分散風險理論，不過講真，太分散，有時會射唔中紅心（Hit Jackpot），仲冇意思，最緊要係投資者教育做得夠唔夠。
加入唔同嘅基金確係可以畀市民更多選擇，但MPF畢竟收費「相對較低」，主動嘅建議服務相對較弱。其實電子金融發展一日千里，透過唔同電子平台可將訊息同大家分享。唔好再懶懶閒，退休生活要靠自己。唔好「辛苦大半生，老來仲傷心」就得啦！
香港大學電子金融服務榮譽助理教授 徐燦傑