港燈集團（00006）因為業務步向全球而打算改名，新名終於正式有定案，叫做「電能實業有限公司（Power Assets Holdings Limited）」，新名原來係要貫徹港燈多年來嘅實幹傳統。
按程序改名要待明年初嘅股東特別大會正式通過，所以集團目前對「電能實業」嘅新標誌以至未來品牌形象嘅部署仍然守口如瓶。不過有一點絲絲可以肯定嘅係，管理層選擇以「電能」為名稱，而未有再取「燈字」為招牌，係要反映集團以投資全球能源及公用事業相關業務為重點嘅發展方向，並非局限於發電相關業務，至於中文名用上「實業」二字，係強調集團一向以「實力」與「實幹」為基礎嘅傳統，予人穩中求進嘅感覺。
講開又講，港燈集團雖然已經改名，但絲絲亦不妨再提醒大家，港燈呢家百年老店嘅名字唔會就此消失，事關今次改名唔會影響集團旗下為港島供電嘅「香港電燈有限公司」，港島居民日後嘅電費單仍肯定會見到以「電」字為記嘅Logo！
余絲韻