絲絲尋日收到風，有新世界發展（00017）「大內總管」之稱嘅執行董事梁志堅將喺本月底榮休，絲絲搵咗「堅叔」成日都搵佢唔到，想了解一下佢嘅退休大計都唔得。雖然堅叔即將退休，不過聽聞佢退休後，得閒都會返公司幫吓老闆「彤叔」及「純官」，畀吓意見，話晒行內唔係好多人好似堅叔咁，有縱橫地產界三、四十年嘅經驗。
今年約70歲嘅堅叔一向作風硬朗，率直敢言，近期政府連番推出嘅樓市措施，如規管一手樓銷售及「發水樓」等辣招，堅叔都積極代表地產建設商會發表意見及大膽批評，好似政府今年中推出「九招十二式」時，堅叔與政府過招兼討價還價，仲話「幾唔鍾意都要照做」；喺賣地場合亦主動批評政府賣樓做法「唔Fair」：「要求地產商賣樓樣樣做足，自己賣地透明度就不足。」
最近幾次商會會議後，發言人已轉由秘書長龍漢標回答傳媒提問，堅叔似乎已為淡出而鋪路。
余絲韻