雖然話全球經濟正復甦，但通縮問題仍困擾美國及日本，唔知一班決策官員有冇諗過學生哥都可以幫到手呢？
加拿大麥吉爾大學搵咗200幾個學生做實驗，叫佢哋利用失業率、國內生產總值（GDP）等經濟數據推算通縮走勢，測試愈準，外快錢愈多，佢哋每次做實驗平均都有30蚊美金㗎！
其實唔只學生哥，加拿大央行研究員都玩埋一份，睇吓第日使唔使採用消費物價指數（CPI）鎖定水平，取代依家設下嘅通脹率目標，令當地家庭以至各行各業喺使費、投資方面有番啲預算，央行亦可以更靈活應對通縮。加拿大央行副行長博伊文話明，預埋「隔籬鄰舍」嘅美國聯儲局主席伯南克一份，打算為今次研究聯手寫番份Report咁話喎！
講到預測通脹，加拿大真係先驅嚟㗎，佢哋係七大工業國（G7）中最早採用通脹目標，依家英倫銀行及歐洲央行等全球12家央行都跟住用。隨着加拿大通脹率目標2%嘅5年協議屆滿，如果佢哋下年轉用CPI目標水平嘅話，又做多次領頭羊喇！
余絲韻