絲絲講場：滬馬拉松籌款 薛關燕萍帶隊出征
恒生中國副董事長兼行政總裁薛關燕萍（Dorothy）係高球好手，跑馬拉松亦難佢唔倒，前日舉行嘅「上海國際馬拉松」，佢帶隊出征，既鼓勵同事齊齊運動，亦為上海市慈善基金會募捐，幫助貧困兒童繼續學業。
鼓勵參與扶助貧童
今次可謂黃浦江今年嘅另一大盛事，吸引來自超過50個國家共22,000人參加，薛太話公司好支持今次慈善跑，並鼓勵同事積極參與，以長跑方式為貧困兒童募集善款。除咗幫員工全額支付報名費用，亦為參加全馬、半馬及健身跑嘅同事，進行唔同金額嘅捐款。
參賽嘅仲有恒生中國3位負責不同領域嘅副行政總裁，即係劉鑑坤、楊榮燊、徐惠賢，仲有約30位內地同事參加唔同路線嘅比賽路段。恒生銀行助理總經理張樹槐（Walter）更參加全馬賽事，進軍佢個人第26個馬拉松，佢喺過去8年已喺五大洲13個城市完成咗25項馬拉松比賽。
余絲韻