平保（02318）以往一向都用好多海外人才，但隨着自家培訓嘅「青年軍」愈嚟愈成熟，唔少人已升到上管理層位置，好似除咗將出任總經理嘅任匯川之外，現任平安產險常務副總經理孫建平就會接替任匯川，出任平安產險董事長兼首席執行官，現任總經理助理王新就會出任平安產險總經理。
唔少喺當年平保成立時加入嘅後生仔，「眨吓眼」已經四、五十歲，正值黃金年代，好似孫建平咁，佢由平安產險嘅基層做起，做過十幾個崗位，曾參與幾次產險行業嘅大改革，好似開拓電話銷售、推動全國車險費率制度改革及交強險制度等。
平安產險嘅人事變動差不多已塵埃落定，但佢哋嘅「A」級評級就畀標普繼續列入負面信用觀察名單，主要由於平保認購深發展新股，呢次認購或降低平保資本實力及整體財務靈活度，不過標普認為平安產險仍然係集團保險業務戰略中不可或缺嘅一環，會從母公司得到有力支持。
余絲韻