港交所（00388）行政總裁李小加雖然曾喺美國留學，講得一口流利英語，但佢始終喺內地成長，又做過記者，中文水平非常高。佢尋日出席經濟峰會研討會時，就引用咗一句成語「葉公好龍」，比喻市場對熱錢、人民幣國際化等嘅心態。
絲絲翻查字典，呢句成語係指古代一個名叫葉公嘅人，平日好喜歡龍，家中掛滿有龍圖案嘅擺設，但當有日真龍探訪佢時，佢就好驚。
大家都知，依家市場最熱門話題係熱錢囤積在港伺機進入內地興風作浪，李小加引用呢句成語形容依家市場嘅心態，估計佢係指市場一向對熱錢、人民幣業務等好有憧憬，但當熱錢一多，市場就開始擔心，而佢就大派定心丸，話內地資本帳開放及人民幣走向全球係大勢所趨，呢個大方向係唔會咁容易有所動搖。
佢話人民幣國際化係漫長道路，可能需時10至30年，所以市場應對人民幣國際化有「三心」：信心、耐心及平常心，若錯了可改。佢又話大家亦要對人民幣國際化「愛護」及保持客觀。
心繫人民幣發展嘅李小加都有輕鬆嘅時候，佢一向熱愛足球，最近佢就代表港交所與深圳證券交易所踢咗場波，賽果係2比2，唔知兩間交易所真正較量時，係咪都會打成平手？
余絲韻