市場熱線：上海電氣 折讓吸引

都係阿伯亂噏QE3惹的禍，或者佢只係出口術，轉移股民對失業率嘅視線。不過，孖屐對QE3嘅反應愈來愈麻木，美金尋日已經回升番些少，經濟學有「邊際效用遞減」，中國兵法有「一鼓作氣，再而衰，三而竭」，老美不斷玩QE只係作法自斃，行咗日本舊路，可算係因果報應。

孖屐氣氛仍疲弱

深中航（00161）大規模注資，但創完新高之後倒跌4.7%收市，英皇國際（00163）搞重組亦係先升後跌，消息股都搞成咁，證明孖屐氣氛疲弱，炒咗幾個月嘅零售股亦有回吐。

尋日得資源股頂得住，好似石油、黃金、水泥、銅及煤炭等，但美金畀QE3嚇一嚇之後反而會壯膽，所以資源股升勢亦未必能成氣候。

華能新能源（00958）同大唐新能源（01798）招股打對台，龍源電力（00916）雖然近日有反彈，但龍頭股表現都麻麻，呢兩隻新丁亦唔慌有好反應。

金風撈底有難度

至於兩隻風電設備股金風科技（02208）同中傳動（00658）同係股價令人失望，祖國風機近期發生成座倒塌；中國發展風電只係呢幾年間嘅事，風機壽命一般係20年以上，但依家三幾年就發現有問題，原因祖國做生意係一窩蜂，變咗產能過剩、競爭激烈、毛利降低、將貨就價。金風不但潛水，更比A股股價折讓33.5%，預測PE 14.5倍，但撈底都留番畀高手。

講完風電設備，又講其他電力設備。三隻股雖然係同類，但走勢絕不雷同，先係東氣（01072）由二月開始已衝衝衝到上月洩氣，哈動（01133）七月起步升勢更急，升到尋日至夠皮。

上海電氣（02727）最古怪，自從舊年中開始一路喺3.3至4蚊之間玩波幅，到九月卒之大突破，升到最高5.75元，然後快速調整到4.69元，但又非一洩如注，近日股價沿住上升軌重拾升勢，尋日收報5.6元，師傅教落：橫行愈耐嘅股爆發力愈勁，所以上氣估計會有「第二春」。

已具追落後條件

老實講，上氣第三季成績表只係普普通通，但公司同時公布獲得印度83億美金大定單。間公司生意係點，要管理層先知道，散戶只能從股價表現估估吓。

電力設備股真係好得意，上氣過往一直係估值最高，但早就被東氣過咗頭，哈動急升之後，上氣同哈動預測PE都係20倍左右，而上氣H股較A股折讓超過四成，淨睇呢幾樣，上氣其實係落後股。

戰報

中國海景（08065）+9%

古晨上周四指中國海景強勢試高位，當日低位0.92元，昨日以全日高位1.01元，累積升幅9.78%。

保利協鑫（03800）+11%

小尾上月二十五日指保利協鑫買盤積極，之後股價反覆上升，昨日高見2.68元，較推介當日低位2.4元累升11.6%。

古勝